એક દિન જુદું પડવાનું....

  - : ભજન : -
 રાગ :- મુખથી હરિનામ ન લીધું.....


જન્મ્યા છે સૌ મારવા માટે , એક દિન જુદું પડવાનું ;
મોત નક્કી છે સૌની માથે ,  એમાં શીદ ને રડવાનું....ટેક ...


લેણ દેણ  ના સંબંધે  સૌને , ભાગ્યે   ભેળું   થાવાનું ;
છેવટ કોઈ કોઈનું નથી રે , ભેળું કોઈ નહિ બળવાનું .. એક દિન જુદું પડવાનું...


ભલે કરી તમે ખુબ કમાણી, રહી ગયું સાચું રળવાનું;
જે  રળેલું સાથે આવે એવું , ભાતું  પુણ્યનું  ભરવાનું... એક દિન જુદું પડવાનું...


માત પિતા ભાઈ ભગિની, એતો મારુમારું કરવાનું ;
કોઈ ના આવ્યું છેવટ સાથે ,  એકલ  તારે  જવાનું ... એક દિન જુદું પડવાનું...


પંખીડાનું  આ  પીંજર મૂકી,  આંખ  પલક માં ઉડવાનું;
'વિઠ્ઠલ' કે આ વિયોગ વસમો, ભવમાં ભેરુ નહિ થાવાનું... એક દિન જુદું પડવાનું...

નોધ : આ રચના મારા પિતાશ્રી ની છે.આ ભજનમાં સાચી સમજણ ની વાત કરી છે.માણસ ગમે તેવો મહાન,વીર,મહાવીર, રંક કે રાય  હોય દરેક ને મૃત્યુ નક્કી છે અને તે પણ એકલા જ જવાનું છે.ના કોઈ સાથે આવે છે કે જાય છે.આ ભજન બોધક છે .